ភ្នំពេញ៖ លោក សុក ស៊ីផាន់ណា ត្រូវបានព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា ទ្រង់បានចេញព្រះរាជក្រឹត្យត្រាស់បង្គាប់តែងតាំង លោកជាសមាជិកពេញសិទ្ធិ នៃរាជបណ្ឌិត្យសភាកម្ពុជា មានគោរមងារជា បណ្ឌិតសភាចារ្យ។ នេះបើតាមព្រះរាជក្រឹត្យដែលចុះនៅថ្ងៃទី១៣ ខែតុលា ឆ្នាំ២០២២។ 

លោក សុក ស៊ីផាន់ណា ជាទីប្រឹក្សារាជរដ្ឋាភិបាលកម្ពុជា និងជាប្រធាននៃវិទ្យាស្ថានចក្ខុវិស័យអាស៊ី AVI និងជាប្រធានលេខាធិការដ្ឋានជាតិនៃកិច្ចសហប្រតិបត្តិការមេគង្គ-ឡានឆាង កាលពីថ្ងៃទី១៨ ខែមេសា ឆ្នាំ២០២២ លោកបានដឹកនាំកិច្ចប្រជុំអនុគណៈកម្មការខ្លឹមសារ និងឯកសារ លើកទី៥ ដើម្បីពិភាក្សាលើវឌ្ឍនភាព និងការត្រៀមរៀបចំសកម្មភាពនានា ដែលគ្រោងនឹងធ្វើឡើងក្នុងឱកាសកម្ពុជាជាប្រធានអាស៊ានឆ្នាំ២០២២ រួមមានកិច្ចប្រជុំរដ្ឋមន្រ្តីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធ និង កិច្ចប្រជុំកំពូលអាស៊ានលើកទី៤០ & ៤១ និងកិច្ចប្រជុំកំពូលពាក់ព័ន្ធ៕